25 нче июль көнне көрәш буенча балалар һәм өлкәннәр арасында Айсаф Айдар улы Галиев истәлегенә «Милләтеңнең якты кояшы син» исеме астында ачык турнир үткәреләчәк. 

Саба районы Иләбәр авылында РСФСРның спорт остасы Айдар Галиевның махсус хәрби операция зонасында хезмәт бурычын үтәгәндә һәлак булган улы, полиция капитаны Айсаф Галиев истәлегенә көрәш турниры узачак.

Әлеге турнирда Арча, Кукмара, Теләче, Балтач, Мамадыш, Саба районнарыннан егетләр катнаша ала.

Катнашучылар иртәнге сәгать 09:30-га кадәр үлчәнеп бетәргә тиеш.

Авырлык категорияләре өлкәннәр арасында 2010 елгы һәм аннан өлкәнрәк булган көрәшчеләр кертелә:
70 кг, 80 кг, 90 кг, 100 кг, 120 кг һәм 120 кг нан югары.

Катнашучыларның һәм судьяларның үзләре белән паспортлары, ПСС, ИНН булырга тиеш.

19 июль Кукмара районы Вахит авылы елдагыча зурлап «АВЫЛ КӨНЕ»н билгеләп үтәчәк.

Башлана: 13.00 сәгатьтә.

Ат чабышы, аркан тартыш, чүлмәк вату, капчык киеп йөгерү, турникта тартылыш, капчык сугышы, көянтә белән су ташу, таяк тартыш һәм башка уеннар белән беррәттән, Сабан туеның йөзе булган милли көрәш тә авыл көнен тулыландырачак.

Балалар көрәшендә 2009 нчы елда һәм 2009 елдан соң туган ир-балалар һәм егетләр 6 авырлык категориясендә:
30 кг, 40 кг, 50 кг, 65 кг, 75 кг һәм 75 кг нан югарырак бил алышачак.

Олылар көрәше:
80 кг, 100кг һәм 100 кг нан югарырак үлчәү авырлыкларында булачак. Көрәшергә килгән барлык көрәшчеләр дә келәмгә кертеләчәк.

Көрәшче Динар Кәримуллин
Мәскәүдә узган Дөнья кубогының абсолют батыры исеменә лаек булды

Мәскәүдә масштаблы спорт ярышлары – көрәш буенча Дөнья кубогы узды. Турнирда дөньяның 26 иленнән 157 спортчы катнашты һәм 11 комплект медаль уйнатылды.

Быел турнир регламентына яңалык кертелде – биредә тарихта беренче тапкыр абсолют категориясендә җиңүче титулы 75 килограммга кадәрге авырлыкта уйнатылды. Мондый формат максималь сандагы катнашучыларга төп бүләк – автомобильгә дәгъва итү мөмкинлеген бирә.

Абсолют категориясендә Татарстан спортчысы, Лаеш районы командасы вәкиле Динар Кәримуллин җиңеп чыкты. Ул абсолют чемпион титулына һәм турнирның төп бүләге – Татарстан Республикасы Рәисе Рөстәм Миңнеханов тапшырган автомобильгә ия булды.

Динар Кәримуллин – көрәш һәм билбаулы көрәш буенча күп тапкыр Татарстан, Россия һәм дөнья чемпионы, «Ватаным Татарстан» газетасы гамәлгә куйган Муса Җәлил истәлегенә багышланган көрәш турниры, Данил Галиев исемендәге турнир җиңүчесе. БРИКС илләре уеннары җиңүчесе. 2024 елда «Алтын билбау» бөтенроссия премиясендә «Ел спортсмены» дигән мактаулы исемгә лаек булды. Спортчы тумышы белән Теләче районыннан. Хәзер Лаешта яши һәм Лаеш командасы өчен чыгыш ясый, Лаеш районы спорт мәктәбендә көрәш тренеры булып эшли.