19 июль Кукмара районы Вахит авылы елдагыча зурлап «АВЫЛ КӨНЕ»н билгеләп үтәчәк.

Башлана: 13.00 сәгатьтә.

Ат чабышы, аркан тартыш, чүлмәк вату, капчык киеп йөгерү, турникта тартылыш, капчык сугышы, көянтә белән су ташу, таяк тартыш һәм башка уеннар белән беррәттән, Сабан туеның йөзе булган милли көрәш тә авыл көнен тулыландырачак.

Балалар көрәшендә 2009 нчы елда һәм 2009 елдан соң туган ир-балалар һәм егетләр 6 авырлык категориясендә:
30 кг, 40 кг, 50 кг, 65 кг, 75 кг һәм 75 кг нан югарырак бил алышачак.

Олылар көрәше:
80 кг, 100кг һәм 100 кг нан югарырак үлчәү авырлыкларында булачак. Көрәшергә килгән барлык көрәшчеләр дә келәмгә кертеләчәк.

Көрәшче Динар Кәримуллин
Мәскәүдә узган Дөнья кубогының абсолют батыры исеменә лаек булды

Мәскәүдә масштаблы спорт ярышлары – көрәш буенча Дөнья кубогы узды. Турнирда дөньяның 26 иленнән 157 спортчы катнашты һәм 11 комплект медаль уйнатылды.

Быел турнир регламентына яңалык кертелде – биредә тарихта беренче тапкыр абсолют категориясендә җиңүче титулы 75 килограммга кадәрге авырлыкта уйнатылды. Мондый формат максималь сандагы катнашучыларга төп бүләк – автомобильгә дәгъва итү мөмкинлеген бирә.

Абсолют категориясендә Татарстан спортчысы, Лаеш районы командасы вәкиле Динар Кәримуллин җиңеп чыкты. Ул абсолют чемпион титулына һәм турнирның төп бүләге – Татарстан Республикасы Рәисе Рөстәм Миңнеханов тапшырган автомобильгә ия булды.

Динар Кәримуллин – көрәш һәм билбаулы көрәш буенча күп тапкыр Татарстан, Россия һәм дөнья чемпионы, «Ватаным Татарстан» газетасы гамәлгә куйган Муса Җәлил истәлегенә багышланган көрәш турниры, Данил Галиев исемендәге турнир җиңүчесе. БРИКС илләре уеннары җиңүчесе. 2024 елда «Алтын билбау» бөтенроссия премиясендә «Ел спортсмены» дигән мактаулы исемгә лаек булды. Спортчы тумышы белән Теләче районыннан. Хәзер Лаешта яши һәм Лаеш командасы өчен чыгыш ясый, Лаеш районы спорт мәктәбендә көрәш тренеры булып эшли.

Мамадыш районында «Питрау» керәшен мәдәнияте бәйрәме 18 июльдә узачак

2026 елның 18 июлендә Мамадыш районы Җөри авылы «Тырлау» аланында керәшен мәдәниятының «Питрау» XXVIII республика бәйрәме узачак.

Җөридәге Питрау бәйрәменә Татарстаннан һәм күрше төбәкләрдән иң оста көрәшчеләр җыелачак.

Спорт ярышлары 16:00 сәгатьтә башланачак.

Ярышта катнашырга теләүчеләргә паспорт яки туу турында таныклык белән килү шарты куелган. Алар сәгать 16:00 – 18:00 сәгать аралыгында үлчәнеп бетәргә һәм теркәлергә тиеш.

Быелгы сабан туенда көрәшчеләр 5 авырлык категориясендә бил алышачак:
2009-2010 нчы елгылар: 50 кг, 65 кг, 75 кг, 80 кг, 95 кг
2011-2013 нче елгылар: 35 кг, 45 кг, 50 кг, 55 кг, 60 кг
Олылар арасында: 65 кг, 75 кг,85 кг,105 кг, 135 кг авырлык категориясендә узачак.

Яшьләр арасында һәр үлчәм авырлыгында беренче урын алучыларга – 25 000 сум, икенче урынга – 20 000, өченче урынга – 15 000 сум акча булачак. Олылар көрәшендә һәр авырлык үлчәмендә җиңүчегә – 50 мең, икенче урынга – 30 мең, өченче урынга – 20 мең сум акчалата приз тапшырылачак.